Gözəllikləri ilə hər kəsi heyran edən quşların özəllikləri | Bala yetişdirə bilməyənlər…

Yer üzünün ən gözoxşayan və eyni zamanda ən ağıllı quşlarından biri – qırmızı ara tutuquşusu bu üstünlüklərinə görə məhv olmaq təhlükəsi ilə üzləşib.

Onlar əsasən Meksikanın cənub-şərqindən başlayaraq Peru və Paraqvaya qədər uzanan tropik meşələrdə yaşayırlar. Bu iri quşun uzunluğu 81-96 santimetr arasında dəyişir, qanad açımı isə təxminən 110-120 santimetrdir. Çəkisi 1 kiloqrama yaxındır.

Bu quşlar çox səsli və nizam-intizamsızdır, buna görə də ev heyvanı kimi saxlamaq o qədər də uyğun deyil. Onların çıxardığı qışqırıq səsi bir neçə kilometr uzaqdan eşidilə bilər.

Qırmızı araların əsas yeməkləri toxumlar, meyvələr, çiçəklər və nektardır. Təbii şəraitdə bu quşlar 30 ilə qədər ömür sürə bilərlər.

Qırmızı aralar uzunmüddətli və sabit cütlüklər yaradırlar. Bu birlikdən balalar dünyaya gələrsə, əlaqə illərlə davam edə bilər. Əgər gənc cütlüklər bir neçə il ərzində bala yetişdirə bilmirlərsə, bir-birindən uzaqlaşıb yeni tərəfdaş axtara bilərlər.

Onlar uzun illərdir ev heyvanı və zooparklar üçün intensiv şəkildə ovlanır, üstəlik, tropik meşələrin ağac sənayesi üçün qırılması onların sayının azalmasına gətirib çıxarıb.