Güney azərbaycanlı fəal Urmiya gölünün quruma səbəbini açıqladı

Dünyanın üçüncü ən duzlu gölü hesab olunan Urmiya gölü sürətlə quruyur.

İran hökuməti isə su hövzəsinin bərpası üçün nəzərdə tutulan tədbirləri həyata keçirmir. Bu səbəbdən əhali arasında və beynəlxalq ictimaiyyətdə belə fikir yaranır ki, molla rejimi bu gölü bilərəkdən qurudur.

Güney azərbaycanlılar illərdir davam edən bu ekoloji terrorla bağlı haqq səslərini ucaldır, sosial şəbəkələrdə mütəmadi olaraq bu məsələni qabardırlar. Bu günlərdə daha bir güneyli fəal Urmiya gölünün qəsdən qurudulması ilə bağlı faktlar açıqlayıb.

Gölün qurumasında sədləri başlıca səbəb kimi göstərən fəal 72 sədd qurulduğunu, onlardan 34-nün işlək olduğunu bildirib. Ekoloji terrorun digər səbəbi isə su hövzəsinin ətrafında 65 min quyunun qazılmasıdır.

25 ildən çoxdur ki, Urmiya gölünün quruması prosesi sürətlə davam edir. Yaxın coğrafiyada Aral gölünün quruyub məhv olması kimi bir fakta şahidlik edən İranın isə bu vəziyyətə biganə yanaşması isə heç də ürəkaçan deyil.