Gürcüstan xarici işlər naziri bölgədəki vəziyyətdən danışdı - Baku TV

“Bu gün Azərbaycanla Ermənistan arasında yeni yolların inşası fəal olaraq müzakirə edilir. Bunun region üçün yaxşı olduğunu əminliklə söyləyə bilərik”.

Bunu Gürcüstanın xarici işlər naziri Maka Boçorişvili “İmedi” telekanalına müsahibəsində deyib.

Onun sözlərinə görə, yaranacaq yeni yollar bölgənin bağlantı baxımından əhəmiyyətini yalnız artıracaq.

“Mən həqiqətən də burada risk görmürəm. Gürcüstan xəritədən yox olmayacaq. Sadəcə olaraq bu gün bağlantılardan danışanların Avropa üçün əsas əlaqə olan Gürcüstandan bəhs etməmələri onların səriştəsini şübhə altına alır”, – deyə Boçorişvili əlavə edib.

Nazir qeyd edib ki, hansısa bir yolun Gürcüstanı əvəzləməsi ağlasığmazdır.

“Gürcüstandan keçən və uzun müddət fəaliyyət göstərən yola tələbat ildən-ilə artır. Bu yola üç və yaxud dörd yeni marşrut əlavə olunsa belə, Qərblə Şərq arasında yük axınlarını nəzərə almaqla kifayət etməyəcək”, – deyə o bildirib.

Gürcüstanın xarici işlər naziri əlavə edib ki, Azərbaycanla Ermənistan arasında ötən ilin avqustun 8-də Vaşinqtonda əldə edilmiş sülh sazişi ABŞ Prezidenti Donald Trampın gündəliyində əsas yer tutur.

Nazir qeyd edib ki, ABŞ-nin vitse-prezidenti Cey Di Vensin Azərbaycan və Ermənistana səfərləri bu sazişin bir növ davamı olub.

“Vensin uzun müddətdir davam edən münaqişəyə son qoyan iki Cənubi Qafqaz ölkəsinə səfəri bunun nümayişi oldu”, – deyə Boçorişvili əlavə edib.

Qeyd edək ki, Ceyms Devid Vens 9-11 fevral tarixlərində rəsmi səfərlə Ermənistan və Azərbaycanda olub.