Gürcüstanda 4 oktyabr aksiyasının təşkilatçıları saxlanılıb

Gürcüstanın Daxili İşlər Nazirliyi Tbilisidə 4 oktyabr tarixində keçirilən etiraz aksiyasının əsas təşkilatçılarının həbs olunduğunu elan edib. Saxlanılanlar arasında "Milli Hərəkat", "Strategiya Ağmaşenebeli" Partiyalarının üzvləri və "Rustaveli Prospekti" hərəkatının liderləri, o cümlədən opera müğənnisi və fəal Paata Burçuladze, Murtaz Zodelava, İrakli Nadiradze, Paata Manjqaladze və polkovnik Laşa Beridze var. Onlar Gürcüstanın Konstitusiya quruluşunu zorla dəyişdirməyə və ya dövlət hakimiyyətini devirməyə çağırışlar etməkdə, habelə qrup şəklində zorakılığın təşkili və ona qoşulmaqda ittiham olunurlar. Bu cinayətlər üçün 9 ilədək həbs cəzası nəzərdə tutulur. Aksiyanın bəzi iştirakçıları Prezident Sarayının mühafizə baryerlərini dağıtmağa cəhd göstərmişdilər.