Gürzənin zəhəri bəzi sirləri açdı | Gözlənilməz qanunauyğunluqlar üzə çıxdı

Cənubi Florida Universitetinin alimləri gürzələrin zəhərini araşdıraraq canlı orqanizmlərin təkamülündə gözlənilməz qanunauyğunluqlar aşkar ediblər.

Nəticələr göstərib ki, izolə olunmuş mühitlərdə bəzi ilan növləri kompleks deyil, əksinə, daha sadə və ixtisaslaşmış zəhərlər inkişaf etdirir. Bu isə uzun müddət qəbul edilən təkamül nəzəriyyələrinə yeni baxış gətirir.

Dosent Mark Marqres Kaliforniya körfəzində yerləşən insan yaşamayan adada 83 ilandan zəhər nümunələri toplayıb. Məqsəd bu zəhərlərin tərkibi ilə həmin ilanların qidalanma vərdişləri və yaşayış mühitləri arasındakı əlaqəni müəyyən etmək olub.

Alimlər bu qənaətə gəliblər ki, mühitdə rəqabət səviyyəsinin yüksək olması və ekoloji ixtisaslaşma təkamül baxımından daha hədəfyönlü və effektiv zəhərlərin inkişafına səbəb olur. Bu isə ənənəvi düşüncəyə, yəni bioçeşidliliyin kompleks uyğunlaşmaları artırdığı fikrinə ziddir.

Tədqiqat göstərib ki, bəzi hallarda canlılar daha sadə, lakin daha məqsədəuyğun uyğunlaşmalara doğru təkamül edə bilir. Bu nəticələr izolasiya və bioçeşidlilikdəki dəyişikliklərin molekulyar səviyyədə orqanizmlərə təsirini daha dərindən anlamağa kömək edir. Zəhər isə bu baxımdan ideal göstərici hesab olunur, çünki o, birbaşa sağ qalma ilə bağlıdır.