Hansı ərazi Rusiyanın, hansı Ukraynanın sayılacaq? - Putinin şərti isə...

Rusiyanın dövlət başçısı Vladimir Putin martın 18-də Sənayeçilər və Sahibkarlar İttifaqının qurultayının qapalı hissəsində bildirib ki, ilhaq edilmiş bölgələr Rusiyanın ərazisi kimi tanınsa, Moskva Odessaya iddia etməyəcək.

Bu barədə “Kommersant”ın xüsusi müxbiri Andrey Kolesnikov məlumat yayıb.

Putin görüşdə deyib ki, Rusiya 2022-ci ildə Ukraynaya qarşı “xüsusi hərbi əməliyyat” adlandırdığı müharibəni başlamazdı, əgər Qərb Krımı Rusiyanın tərkibində qəbul etsəydi və Donetsk və Luqanskın muxtariyyətini tanısaydı.

“Kommersant”ın mənbələri bildiriblər ki, hazırda danışıqlarda söhbət Rusiyanın əldə etdiklərini əlindən almağın mümkünsüzlüyündən və Rusiyanın tərkibində tanınmalı olan ərazilərdən gedir: Krım, Sevastopol və dörd məlum ərazi – “Luqansk və Donetsk xalq respublikaları”, Xerson və Zaporojye vilayətləri”.

“Görüş iştirakçılarının dediyinə görə, əgər bu, yaxın zamanda baş verərsə, Rusiya Odessaya və hazırda Ukraynaya məxsus olan digər ərazilərə iddia etməyəcək”, ‒ A.Kolesnikov bildirib.