Hantavirusun sağqalma temperaturu ilə bağlı məlumat

Hantavirus otaq temperaturunda uzun müddət – iki həftəyə qədər aktivliyini qoruyur.

Bu barədə Novosibirsk Dövlət Universitetinin həkim-infeksionisti Yuliya Yermolayeva yerli mediaya müsahibəsində məlumat verib.

Mütəxəssisin sözlərinə görə, patogen üçün optimal şərait yüksək rütubətlə birlikdə 4 selsi dərəcə ətrafında davamlı aşağı temperaturdur.

Həkimin sözlərinə görə, hantavirus infeksiyasına yoluxma halları ilboyu qeydə alınır, lakin pik həddi ənənəvi olaraq yay və payız aylarına təsadüf edir.

Mütəxəssis izah edib ki, bu, hava şəraitindən daha çox insanların davranışı ilə bağlıdır. Belə ki, isti mövsümdə insanlar daha aktiv şəkildə təbiətdə açıq havada vaxt keçirməyə gedirlər. Bundan əlavə, elə bu dövrdə virusun əsas daşıyıcısı olan gəmiricilərin də populyasiyası artır.

Yuliya Yermolayeva xəbərdarlıq edib ki, qışda yoluxma mexanizmi dəyişir, lakin risk yox olmur. Soyuq hava siçanları və siçovulları daha isti yerlərə – tövlələrə, qarajlara və evlərə köçməyə məcbur edir. İlin bu dövründə tikililərin zəif ventilyasiyası hava-toz yolu ilə ötürülmə təhlükəsini artırır.