“Heç bir elektrik stansiyası və heç bir körpüsü qalmayacaq” | Tramp

“İran Hörmüz boğazından gəmilərin sərbəst keçişinə icazə verməsə, ABŞ İran ərazisindəki bütün elektrik stansiyalarına və körpülərə zərbələr endirəcək”.

Bunu ABŞ Prezidenti Donald Tramp “The Wall Street Journal” qəzetinə müsahibəsində deyib.

“Əgər onlar aprelin 7-nə qədər heç bir tədbir görməsələr, onların heç bir elektrik stansiyası və heç bir körpüsü qalmayacaq”, – deyə Ağ Ev rəhbəri bildirib.

ABŞ lideri vurğulayıb ki, Vaşinqton “çox güclü mövqe” tutur, Tehrana isə “bərpa olunması üçün ən azı 20 il lazım olacaq və bu da ən yaxşı haldadır”.

İran Silahlı Qüvvələri isə öz növbəsində İsrailin cənubundakı neft-kimya obyektlərinə və yanacaq anbarlarına, eləcə də Küveytdə yerləşən Amerika hərbi bazasındakı hərbi texnika anbarları ilə komandanlıq məntəqələrinə zərbələr endirib. Bu barədə İran Ordusunun yaydığı bəyanatda bildirilir.

Məlumata görə, İsrailin cənubunda, Dimona şəhəri yaxınlığında yerləşən neft-kimya müəssisələrinə və neft məhsullarının saxlanılması üçün çənlərə PUA-larla hücum edilib. Bundan başqa, Amerika hərbi kontingentinin Küveytin Bubiyan adasında yerləşən bazasındakı hərbi texnika anbarları, peyk rabitəsi stansiyaları və qərargah obyektləri vurulub.

İran Ordusu iddia edib ki, Arifcan düşərgəsi ciddi ziyan gördükdən sonra ABŞ öz bazasını bu adaya köçürməyə məcbur olub. Yeni yerləşmə yerində İran tərəfi Birləşmiş Ştatların qüvvələrinə məxsus sursat anbarlarına, “HIMARS” reaktiv yaylım atəşi sistemlərinə, habelə rabitə və kəşfiyyat vasitələrinə zərbələr endirib.