“Həm Putin, həm də Zelenski bunu istəyir” | ABŞ-də kritik görüş - Baku TV

ABŞ Prezidenti Donald Tramp Florida ştatındakı Mar-a-Laqo iqamətgahında ukraynalı həmkarı Volodimir Zelenskini qəbul edib.

Tramp ukraynalı həmkarı ilə görüşün media üçün açıq keçirilən hissəsində həm Putinin, həm də Zelenskinin sülh istədiyini bildirib.

Ağ Ev rəhbəri jurnalistlərlə qısa söhbətində deyib ki, Rusiya-Ukrayna müharibəsi çox tez bitə bilər.

O qeyd edib ki, Avropa ölkələri müharibə başa çatdıqdan sonra Ukraynada sülhün qorunmasında əhəmiyyətli dərəcədə iştirak edəcəklər.

Tramp Ukrayna ilə bağlı razılaşmanın konturlarının artıq hazır olduğuna əminliyini ifadə edib.

O, Moskvanın Ukraynada sülhə ciddi yanaşmadığı ilə bağlı iddiaları rədd edib. Eyni zamanda ABŞ Prezidenti hesab edir ki, hər iki tərəf sülh istəyir və razılaşmalar son mərhələdədir.

“Biz danışıqların son mərhələsindəyik. Bu ya bitəcək, ya da çox uzun müddət davam edəcək”, – deyə Tramp bildirib.