Hərbi əməliyyatlar yenidən başlaya bilər?

Vaşinqton İrana qarşı hərbi əməliyyatların yenidən başlanması ehtimalını istisna etmir.

"India Today" kanalının yaydığı məlumata görə, bunu ABŞ dövlət katibi Marko Rubio Hindistana səfəri zamanı deyib.

"Prezident Donald Tramp açıq şəkildə bəyan edib ki, İranın heç vaxt nüvə silahı əldə etməsinə imkan verməyəcək və lazım olan hər şeyi yerinə yetirəcək. O, danışıqlara eyni zamanda diplomatiya yolu ilə nail olmağa üstünlük verir, biz bütün imkanlardan istifadə edirik. Bizim əsas seçimimiz danışıqlar yolu ilə həllə nail olmaqdır və bu istiqamətdə işləməyə davam edəcəyik. Əgər diplomatik yol nəticə verməsə, ABŞ Prezidentinin başqa variantları da var. Lakin biz bunun baş verməsini istəməzdik", – deyə Rubio qeyd edib.

Dövlət katibi həmçinin İranın Hörmüz boğazı və nüvə proqramı ilə bağlı ABŞ-nin şərtlərini qəbul edəcəyi təqdirdə, bundan fayda götürəcəyini bildirib.

Rubio eyni zamanda Vaşinqtonun İranla nüvə proqramı ilə bağlı ciddi danışıqlara başlamağa hazır olduğunu vurğulayıb.