Hindistanda şiddətli yağıntıların səbəb olduğu təbii fəlakət ağır itkilərlə nəticələndi - Baku TV

Hindistanın şimalında leysan yağışlarının səbəb olduğu torpaq sürüşmələri və daşqınlar nəticəsində azı 19 nəfər həlak olub.

Məlumata görə, Cammu və Kəşmirdə təbii fəlakət nəticəsində 11 nəfər ölüb.

Güclü yağışlar Punç və Racuri sərhəd dairələrində torpaq sürüşmələrinə və selə səbəb olub. Bir neçə nəfərin itkin düşdüyü və onların axtarışlarının davam etdiyi bildirilir.

Məcrasından çıxan çaylar alçaq əraziləri su altında qoyub. Punç şəhərində onlarla avtomobili sel suları aparıb, çoxsaylı nəqliyyat vasitələri isə hələ də su altında qalıb.

Təbii fəlakət həmçinin Naqalend ştatında da ciddi fəsadlara səbəb olub. Hadisə zamanı aralarında uşaqların da olduğu 8 nəfər faciəvi şəkildə həlak olub. Hazırda dağıntılar altından meyitlərin çıxarılması və itkin düşənlərin tapılması üçün axtarış-xilasetmə əməliyyatları fasiləsiz şəkildə davam etdirilir.

Hindistan Meteorologiya Xidməti güclü yağışların iyulun 23-dək davam edəcəyini bildirir.