Hindistanda bayram şənliyində baş verən faciə 17 nəfərin həyatına son qoydu - Baku TV

Hindistanın şərqində yerləşən Kəlküttə şəhərində dini bayram zamanı baş verən izdiham nəticəsində azı 17 nəfər həlak olub, çox sayda insan isə xəsarət alıb.

Hadisə yerli vaxtla saat 19:40-da Qriş Park rayonunda müvəqqəti bayram pavilyonunun çıxışında baş verib. Güclü yağış insanların bir yerdə sıx toplaşmasına səbəb olub. Daha sonra festival iştirakçılarının eyni vaxtda ərazini tərk etməyə çalışması vəziyyəti daha da ağırlaşdırıb.

Hüquq-mühafizə orqanlarının açıqlamasına görə, hadisə nəticəsində təxminən 35 nəfər xəstəxanaya çatdırılıb.

Şahidlərin sözlərinə görə, izdiham zamanı çox sayda ziyarətçi huşunu itirib.

Hindistanın Baş naziri Narendra Modinin ofisi həlak olanların ailələrinə 200 min rupi (təxminən 3 500 manat), yaralananlara isə 50 min rupi (təxminən 850 manat) məbləğində kompensasiya ödəniləcəyini açıqlayıb.