Abbas Əraqçi Ərəbistan yarımadasında baş verən proseslərdən narahatlığını bildirdi - Baku TV

İran Ərəbistan yarımadasında baş verən proseslərdən ciddi narahatdır və problemin hərbi yolla həllinə inanmır.

Bu barədə İranın xarici işlər naziri Abbas Əraqçi bildirib.

“İranın mövqeyi aydın və dəyişməzdir. Biz Yəmənin və Səudiyyə Ərəbistanının suverenliyini, müstəqilliyini, birliyini və ərazi bütövlüyünü dəstəkləyirik. Problemin həlli üçün yeganə praktik və davamlı yol kimi hərtərəfli və inklüziv siyasi prosesi müdafiə edirik”, – deyə Əraqçi teleqram kanalında paylaşım edərək çıxışından sitat gətirib.

Onun sözlərinə görə, davamlı sülhə hərbi eskalasiya, məcburetmə, hədələmə və ya yəmənli tərəflərin prosesdən kənarda saxlanılması yolu ilə nail olmaq mümkün deyil. Regiondakı böhranların hərbi həlli yoxdur. Siyasi həll yollarını nəzərə almadan hərbi yanaşmada israr etmək vəziyyəti yalnız daha da mürəkkəbləşdirir.

“İran Ərəbistan yarımadasında baş verən proseslərdən ciddi narahatdır və tərəflər arasında əvvəllər razılaşdırılmış sülh yol xəritəsi əsasında dialoqun asanlaşdırılması üçün istənilən yardımı göstərməyə hazırdır”, – deyə Abbas Əraqçi bildirib.