İçdiyimiz su ilə bağlı bu fakt alimləri də qorxuya saldı

Texas Universitetinin Arlinqton kampusundan olan alimlər suda görünməz bir sağlamlıq təhdidinə diqqət çəkiblər.

Onların araşdırmasına görə, hətta ən müasir təmizləmə qurğuları belə mikroplastiki ‒ diametri 5 millimetrdən az olan plastik hissəcikləri tam şəkildə süzə bilmir. Bu hissəciklər həm su, həm də torpaq vasitəsilə canlı orqanizmlərə daxil olaraq, təhlükəli kimyəvi maddələrin yayılmasına şərait yaradır.

Mikropastiklər qablaşdırma, geyim və digər plastik məhsulların parçalanması nəticəsində yaranır. Tullantı sularla birlikdə filtrasiya sistemlərini keçərək təbiətə qayıdır. Mövcud texnologiyalar onların miqdarını azaltmağa çalışsa da, tam təmizləmə hələ mümkün deyil.

Alimlər bildirirlər ki, mikropastiklərin aşkarlanması və miqdarının ölçülməsi üçün vahid elmi standartın olmaması problemi daha da dərinləşdirir. Müxtəlif laboratoriyaların fərqli yanaşmalar tətbiq etməsi çirklənmənin real miqyasını təyin etməyi çətinləşdirir.

Hazırda elmi komanda suda və havada mikropastiklərin daha dəqiq öyrənilməsi üçün vahid ölçmə və təhlil protokolları üzərində çalışırlar. Məqsəd daha effektiv təmizləmə və filtrləmə texnologiyalarının hazırlanmasına zəmin yaratmaqdır.