İğtişaşlara cəlb olunan şəxslər azadlığa buraxılacaq?

"Aldadılaraq iğtişaşlara cəlb edilən şəxslərin azadlığa buraxılması üçün müvafiq orqanlarla danışıqlar aparılır".

Bunu İran Prezidenti Məsud Pezeşkian ruhanilərlə toplantıda çıxışı zamanı deyib.

"Bizim üçün xalqın narazılığı və sosial bərabərsizliklə barışmaq qəbuledilməzdir, çünki bu vəzifədə olmağımızın fəlsəfəsi milli həmrəyliyin möhkəmləndirilməsi, sosial birliyin təmin edilməsi, dürüst xidmətlərin göstərilməsi və ictimai rəyin qazanılmasıdır", – deyə o bildirib.

İran Prezidenti həmçinin qeyd edib ki, etirazlarda minimal rol oyanayan və aldadılaraq iğtişaşlara cəlb edilən şəxslərin azadlığa çıxması üçün məhkəmə sistemi ilə danışıqlar aparılır.

Onun fikrincə, struktur islahatları, iqtisadi göstəricilərin yaxşılaşdırılması, qonşu və İslam ölkələri ilə münasibətlərin inkişafı, tolerantlıq və gənc nəslin təhsil sisteminin təkmilləşdirilməsi yolu ilə fundamental sosial problemləri həll etmək mümkündür.

Pezeşkian onu da vurğulayıb ki, ABŞ ilə danışıqlar İranın ali dini lideri Əli Xameneinin koordinasiyası ilə aparılır və məqsəd problemləri həll etməkdir.

"O, bütün sahələrdə hökuməti dəstəkləyir", – deyə İran Prezidenti bildirib.