İlon Mask süni intellektin iqtisadiyyatda yaradacağı dəyişikliklərdən danışdı

İlon Mask süni intellektin iqtisadiyyatda yaradacağı dəyişikliklərin gələcəkdə insanları pensiya üçün pul yığmaq məcburiyyətindən azad edə biləcəyini bildirib.

Mövzuya münasibət bildirən sahibkar və texnologiya futuristi Peter Diamandis qeyd edib ki, bu yanaşmanın əsasında texnoloji inkişafın böyük sərvət yaratması və məhsul-xidmətlərin kəskin ucuzlaşması dayanır.

Onun sözlərinə görə, süni intellekt, robototexnika və enerji sahəsində irəliləyişlər iqtisadi artımı sürətləndirə, şirkətlərin gəlirlərini yüksəldə və dövlətlərə vətəndaşlara universal gəlir ödəmək imkanı yarada bilər.

P.Diamandis hesab edir ki, gələcəkdə hökumətlər insanlara aylıq sabit ödənişlər təqdim edə bilər.

Məhsul və xidmətlərin qiyməti aşağı düşdükcə bu vəsaitin alıcılıq qabiliyyəti daha da artacaq. Bununla belə, ekspertlər xəbərdarlıq edirlər ki, belə model insanların əmək bazarından uzaqlaşmasına səbəb ola bilər.

Ekaterina Abramova bildirib ki, uzun müddət iqtisadi fəaliyyətdən kənarda qalmaq bacarıqların zəifləməsi və məhsuldarlığın azalması riskini yaradır. Buna görə universal gəlir təhsil, sahibkarlıq və faydalı fəaliyyətə təşviq edən mexanizmlərlə dəstəklənməlidir.

İlon Mask daha əvvəl də süni intellektin bəzi peşələri əvəz edəcəyini, lakin eyni zamanda yeni imkanlar yaradacağını vurğulamışdı. Onun fikrincə, gələcəkdə işləmək zərurət deyil, seçimə çevrilə bilər.