İnsanlar əvvəlkindən daha uzun yaşayırlar?

Avropa Komissiyası demoqrafik dəyişikliyin iqtisadi artımı və dövlət maliyyəsini qorumaq üçün məqsədyönlü siyasət tələb edəcəyi barədə xəbərdarlıq edib.

Avropa Komissiyası üçüncü demoqrafiya hesabatında bildirib ki, Avropa İttifaqı əhalisinin sayı bugünkü 450,6 milyondan 2050-ci ilə qədər təxminən 445 milyona, 2100-cü ilə qədər isə 398,8 milyona düşəcək, halbuki insanlar əvvəlkindən daha uzun yaşayırlar.

Hesabatda deyilir ki, 2050-ci ilə qədər Avropa İttifaqı ölkələri sakinlərinin təxminən üçdəbiri 65 və ya daha yuxarı yaşda olacaq, bu gün isə həmin göstərici hər beş nəfərdən biridir.

Komissiya bildirib ki, azalan əməkqabiliyyətli əhalinin çatışmazlığını kompensasiya etmək üçün əmək bazarında daha çox iştirak və məhsuldarlıq tələb olunacaq.

Hesabata görə, əməkqabiliyyətli əhalinin təxminən 20 faizi hazırda əmək bazarından kənardadır, gender məşğulluq fərqi isə 10 faiz bəndi səviyyəsindədir və təxminən 8 milyon gənc nə təhsil, nə məşğulluq, nə də təlim sahəsində təmsil olunur.

Hesabatda bildirilir ki, əhalinin qocalması səhiyyə və uzunmüddətli qayğıya tələbatı da artıracaq, dəstəyə ehtiyacı olan insanların sayının 2070-ci ilə qədər 36 milyondan 48 milyona çatacağı, 80 və daha yuxarı yaşda olanların payının isə ikiqat artacağı gözlənilir.