İran əgər bunu edərsə, mənfi nəticələri olacaq | G7 yekun bəyanatı yaydı

İranın Rusiyaya ballistik raketlər verməsi “Böyük yeddilik” (G7) ölkələrinin mənfi reaksiyasına səbəb olacaq.

Bu barədə “G7”nin xarici işlər orqanları rəhbərlərinin Kapri adasında keçirilən görüşdən sonra yekun bəyanatı yayılıb.

“Biz İranı Rusiyanın Ukraynada apardığı hərbi əməliyyatları dəstəkləməyi dayandırmağa çağırırıq”, – sənəddə bildirilib.

Xarici işlər nazirləri hesab ediblər ki, İranın Rusiyaya silah ötürmə addımları İslam Respublikasına qarşı yeni sərt tədbirlərin görülməsinə gətirib çıxaran “əhəmiyyətli bir ağırlaşma” olacaq.

Eyni zamanda “G7” nümayəndələri Şimali Koreyaya da xəbərdarlıq ediblər. Onlar Moskvaya hərbi tədarükün dərhal dayandırılmasını tələb ediblər.

Bundan əvvəl Ağ Evin strateji kommunikasiyalar üzrə koordinatoru Con Kirbi bildirib ki, ABŞ administrasiyası Rusiya Federasiyası ilə İran arasında hərbi-texniki əməkdaşlığın genişləndirilməsi ilə əlaqədar əlavə sanksiyaların tətbiqi imkanlarına icazə verib.