İran nümayəndə heyəti Qətərdə nələri müzakirə edəcək? - Baku TV

İranın Qətərdəki nümayəndə heyəti dondurulmuş aktivlər və Hörmüz boğazının blokadası ilə bağlı razılaşma axtarır.

"Euronews" Dohada İran parlamentinin sədri Məhəmməd Baqir Qalibaf və xarici işlər naziri Abbas Əraqçinin apardığı danışıqlara dair mənbələrə istinadən bu məlumatı yayıb.

"İranın xarici işlər naziri Abbas Əraqçinin də iştirak etdiyi Doha səfərində Hörmüz boğazı və yüksək səviyyədə zənginləşdirilmiş uranla bağlı məsələlərə diqqət yetirilib", – deyə məlumatda bildirilib.

İranın Mərkəzi Bankının rəhbəri Əbdülnasir Hümməti də dondurulmuş aktivləri müzakirə edəcək. Bu məsələnin yekun razılaşmada öz əksini tapdığı bildirilir.

Qeyd olunub ki, Vaşinqton beynəlxalq sanksiyalara məruz qalan Tehranın dondurulmuş xarici aktivlərinin bir hissəsini sərbəst buraxmağa razılaşıb.

"Bunun müqabilində Hörmüz boğazındakı məhdudiyyətlər və İran limanlarına gəlib-gedən gəmilərə tətbiq edilən dəniz blokadası ləğv ediləcək", – deyə məlumatda vurğulanıb.

İranın Qətərdəki dondurulmuş aktivlərinin dəqiq məbləği qeyri-müəyyən olaraq qalır.

Qeyd edək ki, beynəlxalq media qurumları daha əvvəl bu rəqəmin 6 milyard, İran rəsmiləri isə 12 milyard dollar olduğunu bildiriblər.