İran rəsmiləri ABŞ Prezidentinin bəyanatını təkzib edib - Baku TV

İran rəsmiləri və dövlət mediası ABŞ Prezidenti Donald Trampın İran həbsxanalarından amerikalı vətəndaşın azad olunması barədə verdiyi bəyanatı qəti şəkildə rədd edib.

“IRIB News” agentliyinin yaydığı məlumata görə, İran tərəfi ölkə həbsxanalarında saxlanılan hər hansı ABŞ vətəndaşının azad olunması və ya mübadilə edilməsi faktını tamamilə təkzib edib.

Qeyd edək ki, bundan əvvəl Ağ Ev rəhbəri Donald Tramp özünün “Truth Social” hesabında bir ABŞ vətəndaşının azadlığa buraxıldığını iddia edib. Ağ Ev rəhbəri 2024-cü ilin dekabrında İranda saxlanılan ABŞ vətəndaşına ölkəni tərk etməyə icazə verildiyini bildirib.

O qeyd edib ki, Co Bayden hakimiyyəti dövründə əsassız olaraq saxlanılan ABŞ vətəndaşı artıq İranı tərk edib və özünü yaxşı hiss edir. “ABŞ İranın bu xoşməramlı addımını yüksək qiymətləndirir”, – deyə Tramp yazıb.

Həmin şəxsin vəkili Cared Genser də müştərisinin azad olduğunu təsdiqləyib. Lakin Tehranın rəsmi mövqeyi bu məlumatla ziddiyyət təşkil edərək, vəziyyətdə ciddi diplomatik anlaşılmazlığın olduğunu göstərir.