İrana növbəti hücum | Ölənlər və onlarla yaralanan var

ABŞ Ordusunun İranın Sirik şəhərində yaşayış məntəqələrindən birinə endirdiyi hava zərbəsi nəticəsində ölən və yaralananların sayı artıb.

İranın “Tasnim” agentliyinin məlumatına görə, zərbənin toy mərasiminin keçirildiyi obyektə endirilməsi nəticəsində ölənlərin sayı 4-ə çatıb, yaralıların sayı isə 50 nəfərdir.

Məlumata görə, hücum zamanı daha iki nəfər həyatını itirib. İranın IRIB telekanalı əvvəlcə hadisə nəticəsində bir neçə vətəndaşın yaralandığını, ölənlərin olub-olmadığının isə araşdırıldığını bildirmişdi.

Daha sonra “Tasnim” Sirikdə toy mərasiminə endirilən zərbə nəticəsində iki nəfərin öldüyünü və 20 nəfərin yaralandığını açıqlayıb.

ABŞ-nin hücumlarından sonra İranın Konarak liman şəhəri və Qeşm adasında da partlayış səsləri eşidilib. “Tasnim”in məlumatına görə, Konarakda 6, Qeşm adasının cənub sahilində isə 8 partlayış səsi qeydə alınıb.

Partlayışların dəqiq yeri və səbəb olduğu zərərin həcmi barədə məlumat verilməyib. Qeşm hava limanına zərbə endirilməsi rəsmən təsdiqlənməyib. Həmçinin Bəndər Abbas və Sirikin bəzi ərazilərində partlayış səslərinin eşidildiyi bildirilib.