İranda matəm elan edilib

İranın Kerman əyalətində baş verən terror aktı ilə əlaqədar ölkədə matəm elan edilib.

Bu barədə Fars Agentliyi məlumat yayıb. Hadisə nəticəsində 100-dən çox şəxs ölüb, 200-ə yaxın yaralı var.

Türkiyə Prezidenti Rəcəb Tayyib Ərdoğan İranda baş verən terror aktı ilə bağlı başsağlığı verib. Bu barədə ölkə başçısının “X” sosial media hesabında paylaşım edilib.

“İranın Kerman əyalətində törədilən dəhşətli terror aktları bizi dərindən kədərləndirdi. Dost və qardaş İran xalqına başsağlığı verirəm”, – paylaşımda deyilir.

Türkiyə XİN də terror aktı ilə bağlı bəyanat yayıb.

“İranın Kerman şəhərində törədilən terror aktı nəticəsində çox sayda ölən və yaralananın olmasını təəssüflə öyrəndik. Biz bu mənfur terror hücumunu ən kəskin şəkildə pisləyirik. Dost və qardaş İran xalqına və hökumətinə başsağlığı verir, hücumda həyatını itirənlərə Allahdan rəhmət, yaralılara şəfa diləyirik”, – bəyanatda bildirilib.

Rusiya Prezidenti Vladimir Putin də İrandakı terror aktı ilə bağlı başsağlığı verib.