İrandan ABŞ-yə sərt xəbərdarlıq | Trampın komandasında ara niyə qarışdı? - Baku TV

ABŞ Prezidenti Donald Tramp İranla razılaşma əldə etməyə çalışdığı bir vaxtda administrasiyasının iki yüksəkvəzifəli rəsmisi – vitse-prezident Cey Di Vens və dövlət katibi Marko Rubio Tehranla danışıqlar prosesinə fərqli yanaşmalar sərgiləyir. Bu barədə “Axios” yazıb.

Bildirilib ki, Vens daha ehtiyatlı mövqe sərgiləyir. Düşünür ki, Tehranla razılaşmanın gərginliyi azaltmaq və Hörmüz boğazında keçidi normallaşdırmaq ABŞ iqtisadiyyatının sabitliyinə töhfə verə bilər. Rubio isə daha sərt mövqe tutur, İrana qarşı təzyiqin davam etdirilməsinin vacibliyini vurğulasa da, danışıqlar prosesini də dəstəkləyir.

Həmçinin qeyd edilib ki, danışıqların uğurlu olması və bunun qlobal neft bazarının sabitliyinə təsiri Trampın İran, İsrail və Livan arasında maraqlar balansını qura bilməsindən, eləcə də bu iki fərqli yanaşmadan necə istifadə etməsindən asılı olacaq.

“İran yalnız Tehranla Vaşinqton arasında imzalanan memorandumunun bütün bəndləri yerinə yetirildikdən sonra yekun razılaşma üzrə danışıqlara başlayacaq”. Bunu isə İranın Xarici İşlər Nazirliyinin rəsmi nümayəndəsi İsmayıl Bəqai səsləndirib.

“ABŞ ilə görüşün bir məqsədi olmalıdır. Əgər yekun razılaşma üzrə danışıqlara başlamaqdan söhbət gedirsə, bu, anlaşma memorandumunun bütün bəndləri yerinə yetirildikdən sonra mümkündür. Yaxın günlərdə mövcud prosesi qiymətləndirməli və yekun razılaşma üzrə danışıqlara nə vaxt başlayacağımıza qərar verməliyik”, – deyə o bildirib.

İran həmçinin Yaxın Şərqdə müharibənin dayandırılmasına yönəlmiş qarşılıqlı anlaşma memorandumunun mümkün pozulmasının nəticələri barədə ABŞ-yə xəbərdarlıq edib.

“Biz heç bir addımı cavabsız qoymayacağıq. İranın hədəflərinə qarşı hər hansı təcavüz aktı dərhal və qətiyyətli cavabla qarşılanacaq”, – deyə Bəqai əlavə edib.