İranın bir neçə şəhərində etiraz aksiyaları keçirilib

İranın bir neçə şəhərində etiraz aksiyaları davam edib.

Bu barədə müstəqil İran mediası məlumat yayıb.

İranın sonuncu şahı Məhəmmədrza Pəhləvinin oğlu Rza Pəhləvi son müraciətində xalqı ümumxalq tətil və genişmiqyaslı etirazlara qoşulmağa çağırıb.

İqtisadi vəziyyətin ağırlaşmasına etiraz olaraq Tehran, İsfahan, Əhvaz, Şiraz, Kirmanşah və Nəcəfabad da daxil olmaqla müxtəlif şəhərlərdə sahibləri dükanları bağlayaraq etiraz aksiyaları keçiriblər.

Tələbə təşkilatları və fəalların çağırışlarından sonra Tehran, İsfahan və Yəzd də daxil olmaqla ölkənin müxtəlif şəhərlərində tələbələr aksiyalara qoşulublar.

Etirazçılar aksiyalar zamanı “Diktatora ölüm”, “Nə Qəzza, nə Livan, canım İrana fəda”, “Vilayəti-fəqih sisteminə ölüm”, “Bu bahalılığa ölüm, sona qədər gedirik”, “Bu son döyüşdür, Pəhləvi qayıdacaq” və “Rza şah, ruhun şad olsun” kimi şüarlar səsləndiriblər.

Kirmanşah və Tehranda etiraz edən vətəndaşlar təhlükəsizlik qüvvələrinə müqavimət göstərərək onları geri çəkilməyə məcbur ediblər.