İranın əks-hücumu nəticəsində azı 35 nəfər xəsarət alıb

İranın İsrailə endirdiyi raket zərbələri nəticəsində azı 35 nəfər xəsarət alıb. Bu barədə Milli Tibb Xidmətinin direktoru Eli Bin bildirib.

Onun sözlərinə görə, iki nəfərin vəziyyəti ağırdır, digərləri qəlpələrdən yüngül və ya orta dərəcəli xəsarətlər alıblar.

İsrail polisi bildirib ki, hazırda minatəmizləyənlər raketlərin düşdüyü yerlərdə işləyirlər.

Məlumata görə, Təl-Əvivin Maliyyə Mərkəzi, İsrail Müdafiə Nazirliyi, İqtisadiyyat Nazirliyi, Təl-Nof Hava Bazası, Hayfa bölgəsində bir neçə nöqtə, Qəzza sahilində qaz platforması zərbələrə məruz qalıb.

“Tehrana qarşı hərbi əməliyyata başlayandan sonra İsrailə cavab zərbəsi endirən İran bütün qırmızı xətləri keçib”. Bunu İsrailin müdafiə naziri İsrael Katz söyləyib.

“İran İsrailin əhalinin sıx məskunlaşdığı mülki ərazilərinə raketlər atmağa cəsarət etməklə bütün qırmızı xətləri keçdi. Biz İsrail vətəndaşlarını müdafiə etməyə davam edəcəyik”, – deyə nazir əlavə edib.