İranın qərargahı vuruldu, Tehran qisasa keçdi | “Savaşın başlamasında bəhanə...”

İsrail İranın Rəşt şəhərinə zərbələr endirib.

TASS-da yayılan məlumata görə, bu barədə İranın Gilan vilayətinin valisinin müavini Əli Baqeri bildirib.

Səfidrud texnoloji parkı hədəf alınıb. İsrail hərbçiləri Tehranda onlarla hədəfi, o cümlədən İran Müdafiə Nazirliyinin Müdafiə İnnovasiyaları və Tədqiqatları Agentliyinin qərargahını vurublar. İsfahan da atəşə tutulub.

"Əl-Cəzirə"də yayılan məlumata görə isə İran İsrailin cənubuna hücuma başlayıb. 8 gündür ki, davam edən gərginliyinə son qoymaq üçün İranın xarici işlər naziri Abbas Əraqçinin Cenevrədə Fransa, Almaniya və Böyük Briyaniyadan olan həmkarları ilə danışıqlar aparması gözlənilir.

Atom Enerjisi üzrə Beynəlxalq Agentliyin baş direktoru Rafael Qrossi hesab edir ki, İsrailin hücumları başlayan zaman İran nüvə bombası yaratmaqla məşğul olmayıb.

O, “La Nacion” qəzetinə müsahibəsində deyib ki, İran nüvə proqramı ilə bağlı bizi tam məlumatlandırmırdı, amma bu o demək deyil ki, İslam Respublikası nüvə silahı hazırlayırdı.

“İran uranı 60 faiz zənginləşdirirdi və bu, hərbi məqsədlərə lazım olan rəqəmlərə yaxındır. Nüvə başlığı üçün uranın 90 faiz zənginləşdirilməsi gərəkdir. Biz İranın nüvə silahı hazırladığına dair sübut irəli sürməmişik. Amma savaşın başlamasında MAQATE-nin hesabatını bəhanə edirlər”, ‒ deyə R.Qrossi bildirib.