İranın Xarq adasındakı hərbi obyektlərə zərbə endirilib

ABŞ Prezidenti Donald Tramp Birləşmiş Ştatların Silahlı Qüvvələri tərəfindən İranın Xarq adasında yerləşən hərbi hədəflərinə ağır zərbələr endirdiyini bəyan edib.

Bu barədə ABŞ lideri "Truth Social" platformasında qeyd yazıb.

"Mənim göstərişim əsasında ABŞ Mərkəzi Komandanlığı Yaxın Şərq regionu tarixindəki ən kütləvi bombardmanlardan birini icra edərək, İranın əsas dəyəri sayılan Xarq adasındakı bütün hərbi obyektləri tamamilə darmadağın edib", – deyə Tramp bildirib.

ABŞ rəhbəri adada olan neft infrastrukturuna toxunmamaq qərarı aldığını xüsusi vurğulayıb.

"Əgər İran və ya digər tərəflər gəmilərin Hörmüz boğazından sərbəst, eləcə də təhlükəsiz hərəkətinə əngəl yaradacaq hər hansı bir davranışa yol verərsə, bu qərara dərhal yenidən baxılacaq", – deyə Tramp əlavə edib.

Buna cavab olaraq, İslam İnqilabı Keşikçiləri Korpusu (SEPAH) Xarq adasındakı Hava Hücumundan Müdafiə Sistemlərinin ABŞ tərəfindən bütövlüklə sıradan çıxarılması ilə bağlı yayılan xəbərləri yalanlayıb.

SEPAH-ın verdiyi məlumata əsasən, ABŞ-nin zərbələri nəticəsində adanın ərazisində 15-dən çox partlayış baş verib. Buna baxmayaraq, qurum neft infrastrukturuna aid heç bir təsisatın zərər görmədiyini bildiriB.

Məlumatda həmçinin qeyd edilib ki, hava hücumundan müdafiə sistemlərinin fəaliyyəti ABŞ-nin həyata keçirdiyi hücumdan təxminən bir saat sonra bərpa olunub.