İranlı fəal molla rejiminin daha bir cinayətindən danışdı

İranda aylardır davam edən etirazlar hələ də səngimək bilmir. Mühafizəkar molla rejiminin qadağaları, təhdidləri altında əzilən sadə vətəndaşlar artıq hüquqlarının təmin olunması yolunda bütün təzyiqlərə duruş gətirirlər.

Fars-molla rejiminin daha bir qurbanı olan yazıçı və fəal Hamed Esmaelion ailəsinin başına gətirilənlər barədə “Vaşinqton Post”a müsahibə verib. Belə ki, 8 yanvar 2020-ci ildə Ukraynaya məxsus təyyarənin İslam İnqilabı Keşikçiləri Korpusu tərəfindən vurulması nəticəsində Esmaeilionun həyat yoldaşı Parisa və tək övladı, 9 yaşlı Reera həlak olub.

Dəhşətli qəzadan bir neçə ay sonra Esmaeilionlə ölən digər şəxslərin qohumları PS752 saylı Təyyarə Qəzası Qurbanlarının Ailələri Assosiasiyasını yaratdılar. Onlar ədalətin bərpası və günahkarların layiqli cəza almasını tələb edirlər. Bu assosiasiyanın üzvləri hazırda da davam edən aksiyalarda iştirak edənlərlə birlikdə vahid amal – cinayətkar rejimin cəzasını alması üçün mübarizə aparırlar. Esmaelion İrandakı rejimi Beynəlxalq Cinayət Məhkəməsinə verib, onun başlatdığı etiraz alovu İrandakı etirazçılar üçün bir nümunəyə çevrilə bilər. Yazıçı İranı cənginə alan etirazın xalqının gələcəyi üçün ümid vəd etdiyini və mitinqlərin liderinin elə xalqın özü olduğunu vurğulayıb.

Etirazlara görə artan edamlara da münasibət bildirən Hamed qeyd edib ki, molla rejiminin qəddarlığının sərhədi yoxdur. Hamed Esmaelion son olaraq inqilabi dəyişikliklərin bir gecədə baş vermədiyini və etirazları davam etdirərək istədiklərinə nail ola biləcəklərini vurğulayıb.