İrəvanın Rusiyaya yaxınlığı İranı narahat edir | Rəisidən sərt sözlər

Ermənistan Baş nazirinin müavini Mqer Qriqoryanın başçılıq etdiyi nümayəndə heyətinin İrana sonuncu səfəri gərgin atmosferdə keçib.

Bu barədə erməni mediası məlumat yayıb. Bildirilib ki, fevralın 14-də baş tutan səfər zamanı Tehran İrəvanın Rusiyanın Ermənistandakı mövcudluğuna son qoyma cəhdlərindən və Qərbə yaxınlaşmasından narazılığını ifadə edib.

Nəşrin iddiasına görə, İran Prezidenti İbrahim Rəisi Ermənistan nümayəndə heyətinin üzvləri ilə görüşündə İrəvana xəbərdarlıq edib və bildirib ki, İran regionda xarici qüvvələrin olmasına imkan verməyəcək.

Qeyd olunub ki, Ermənistan Rusiya ilə müttəfiqlikdən imtina edəcəyi təqdirdə İran bu ölkənin təhlükəsizliyini təmin etməyi təklif edib. Müəllifin sözlərinə görə, Tehran Zəngəzurda İrana məxsus hərbi bazanın qurulması təklifini də irəli sürüb. Rəsmi Tehran ultimatumu gizlətməyib.

İran Prezidentinin rəsmi saytında belə erməni nümayəndələrlə görüşlə bağlı açıqlamada İ.Rəisinin sözlərindən sitat gətirilib:

“Biz problemlərin həlli bəhanəsi ilə regionda kənar şəxslərin olması ilə razılaşmırıq və inanırıq ki, onların mövcudluğu nəinki problemi həll etməyəcək, əksinə, xalqlar və hökumətlər üçün daha böyük problemə çevriləcək”.

Xatırladaq ki, fevralın 14-də Tehranda 18-ci Ermənistan-İran hökumətlərarası komissiyasının iclası keçirilib. Tərəflər ticarət dövriyyəsini ildə 3 milyard dollara çatdırmaq barədə razılığa gəliblər.