İsrail Ordusundan iddia | Qəzzada ölən jurnalistlər barədə açıqlama

İsrail ordusu Qəzza zolağında ölən Qətərin “Əl-Cəzirə” telekanalının iki jurnalistinin terror fəaliyyətində iştirak etdiyini iddia edib.

Bu barədə ölkənin Müdafiə Ordusu sosial media hesabında bildirib.

Qeyd olunub ki, hər iki media işçisi HƏMAS və “İslami Cihad” hərbi qruplaşmalarına xidmət ediblər və onların əlində bunu sübut edən dəlillər var:

“Yanvar 7-də İsrail qoşunları Rəfah bölgəsində düşmənə məxsus pilotsuz uçuş aparatı aşkar edib. Həmin PUA yaxınlıqdakı əsgərlər üçün təhlükə yaradıb. PUA-nın idarə edildiyi məntəqənin məhv edilməsi məqsədilə İsrail ora təyyarə göndərib. Daha sonra isə Fələstin mediası jurnalistlər Həmzə əl-Dahduh və Mustafa Suryanın hücumlar zamanı həlak olduğunu bildirib. Mustafa Surya Qəzza şəhərində HƏMAS briqadasının üzvü və əl-Qadisiyyə batalyonunun komandir müavini olub, Həmzə əl-Dahduh isə radikal “İslami Cihad” qruplaşmasının fəaliyyətlərində iştirak edib”.

Məlumat üçün bildirək ki, “Əl-Cəzirə” telekanalı SAXAL-ın verdiyi bu açıqlamanı qətiyyətlə rədd edib. Media orqanı cavab olaraq İsrailin qəsdən jurnalistləri hədəf aldığını və bu cinayətin cavabsız qalmamalı olduğunu bildirib.