İsrailə hücumun sifarişini HƏMAS-a İran verib?

ABŞ HƏMAS-ın İsrailə hücumları qarşısında İran hökumətinin yüksək rütbəli məmurlarının “hazırlıqsız olduğunu” göstərən xüsusi kəşfiyyat məlumatlarına çıxış əldə edib.

CNN xəbər verir ki, ABŞ-nin əldə etdiyi ilk özəl kəşfiyyat məlumatlarına əsasən, İran rəsmiləri HƏMAS-ın başlatdığı hücumdan “təəccüblənib”.

Mənbələr qeyd ediblər ki, müvafiq kəşfiyyat məlumatları İranın hücumların “planlaşdırılması və ya təsdiqi proseslərində bilavasitə iştirak etdiyi” iddialarını şübhə altına alır, çünki bu, İranın “hazırlıqsız vəziyyətdə qaldığını” göstərir.

Əldə olunan nəticələrə əsasən, amerikalı analitiklər İran hökumətinin HƏMAS-ın hücumunda birbaşa rol oynamadığına dair ilkin qənaətə gəliblər və bu barədə Konqres üzvləri məlumatlandırılıblar.

Sözügedən məlumatların “son dərəcə həssas” olduğu və mahiyyəti ilə bağlı heç bir detalın paylaşılmadığı bildirilir.

Digər tərəfdən, eyni mənbələr ABŞ kəşfiyyat bölmələrinin Tehranın hücumda birbaşa iştirak edib-etməməsi ilə bağlı hələ tam nəticəyə gəlmədiklərinə diqqət çəkiblər.

ABŞ-nin milli təhlükəsizlik üzrə müşaviri Ceyk Sallivan oktyabrın 11-də Ağ Evdə jurnalistlərə bildirib ki, İranın HƏMAS-a ümumi silah və maliyyə dəstəyinə baxmayaraq, son hücumlarda birbaşa iştirakına dair heç bir əlamət görməyiblər.