İsrailin Fələstinə endirdiyi zərbələr nəticəsində 37 dinc sakin yaralandı - Baku TV

İsrail ordusunun Qəzza zolağının mərkəzində yerləşən Nuseyrat qaçqın düşərgəsində dəfn mərasiminə toplaşan fələstinlilərə endirdiyi zərbə nəticəsində azı 8 nəfər həlak olub, 20 nəfər isə xəsarət alıb.

Bu barədə yerli mənbələr məlumat yayıb.

Qeyd olunur ki, zərbə daha əvvəl İsrail hücumu nəticəsində həyatını itirmiş fələstinlinin cənazəsini Əl-Avda Xəstəxanasının qarşısından yola salmaq üçün toplaşan mülki şəxsləri hədəf alıb. Yaralılar Əl-Avda Xəstəxanasına çatdırılıb. Onlardan bəzilərinin vəziyyətinin ağır olduğu bildirilir. Bu səbəbdən ölənlərin sayının arta biləcəyi istisna olunmur.

Qəzza zolağındakı xəstəxana mənbələrinin məlumatına əsasən, İsrail ordusunun bölgənin müxtəlif hissələrinə səhər saatlarından etibarən həyata keçirdiyi hücumlar nəticəsində son sutka ərzində ümumilikdə 14 fələstinli həlak olub, 37 nəfər isə yaralanıb.