İsrailin hücumları ilə əlaqədar olaraq Livanda təcili tədbir

İsrail Ordusu Livanın cənubunda yerləşən 12 kənd və qəsəbənin dərhal təxliyəsinə çağırıb.

Buna səbəb kimi “Hizbullah” hərəkatının atəşkəs razılaşmasını pozması göstərilir. Bəyanatda vurğulanıb ki, İsrail Ordusu buna qarşı güclü tədbirlər görməyə məcburdur və sakinlərdən evlərini dərhal tərk etmələri tələb olunur.

Livan Səhiyyə Nazirliyinin məlumatına görə, İsrail Hərbi Hava Qüvvələrinin ölkənin cənubunda “Hizbullah”ın mövqelərinə endirdiyi hava zərbələri nəticəsində 6 nəfər həlak olub.

Nazirliyin açıqlamasında bildirilib ki, Nəbatiyyə vilayətinin Kəfr Sir kəndinə hava hücumu zamanı 4 mülki şəxs həyatını itirib. Haruf qəsəbəsində isə 1 nəfər ölüb.

Bundan əlavə, Frun bölgəsində İsrailə məxsus pilotsuz uçuş aparatının motosikleti hədəfə alması nəticəsində daha 1 nəfərin öldüyü deyilir, həmin şəxsin “Hizbullah”ın üzvü olduğu ehtimal olunur.

Məlumata görə, İsrail qırıcıları Livanın hava məkanında uçuşlarını davam etdirir və quru hədəflərinə zərbələr endirir.

Qeyd edək ki, Livan Səhiyyə Nazirliyi ötən gün yaydığı hesabatda martın 2-dən etibarən davam edən hərbi eskalasiya nəticəsində ölənlərin sayının 3020 nəfərə, xəsarət alanların isə 9273 nəfərə çatdığını açıqlayıb.