İsrailin Livanda "Hizbullah"a qarşı əməliyyatları davam edir

İsrail Ordusu son 24 saat ərzində Livanda “Hizbullah” hərəkatı ilə əlaqəli 200-ə yaxın obyektə hücum edib. Livanın cənubunda “Hizbullah”ın 50 yaraqlısı məhv edilib.

Bu barədə ordunun mətbuat xidməti xəbər yayıb.

Məlumata görə, İsrail hərbçiləri Livanın cənubundakı reydlər zamanı yeraltı tunellər, reaktiv yaylım atəşi sistemləri, minaatan və tank əleyhinə raketlər, habelə “Hizbullah” hərəkatının hərbi obyektlərini, hərbi texnikasını, silah və sursatlar aşkar ediblər.

Qeyd edək ki, sentyabrın 23-də İsrail Ordusu “Hizbullah” hərəkatına qarşı əməliyyata başlayıb. Sentyabrın 27-də Beyrutda “Hizbullah”ın baş katibi Şeyx Həsən Nəsrullah öldürülüb. Hərəkat onun ölümünü təsdiqləyib və İsrailə qarşı mübarizəni davam etdirəcəyini vəd edib. Oktyabrın 1-də İsrail Ordusu Livanın cənubunun sərhəd bölgələrində quru əməliyyatına başladığını elan edib.