Katerina Raşevskaya: "Rusiya ukraynalı uşaqları Şimali Koreyaya aparır"

“Rusiya bəzi ukraynalı uşaqları öz vətənlərindən 9000 kilometr uzağa – Şimali Koreyadakı düşərgələrə aparıb”.

Ukraynalı hüquq müdafiəçisi Katerina Raşevskaya ABŞ Konqresindəki çıxışında məsələ ilə əlaqədar iki sənədləşdirilmiş fakt barədə məlumat verib

“12 yaşlı Mişa işğal edilmiş Donetsk vilayətindən, 16 yaşlı Liza Simferopoldan Şimali Koreyanın Sonqdovon düşərgəsinə göndərilib”, – ukraynalı hüquqşünas Konqres üzvlərinə deyib.

Ukraynanın rəsmi məlumat bazasına görə, 2022-ci ilin fevralından bəri işğal olunmuş ərazilərdən ən azı 19 546 uşaq qaçırılıb.

Qeyd edilib ki, onların çoxu Rusiya və ya Rusiyanın nəzarət etdiyi Ukrayna bölgələrinə aparılıb.

Həmin məlumata əsasən, bu uşaqların əhəmiyyətli hissəsi məcburi şəkildə övladlığa götürülüb.

Raşevskaya həmçinin Belarusdakı hərbi düşərgələrdə ideoloji təlimlərə məruz qalan ukraynalı uşaqlar barədə 165 sənədləşdirilmiş faktın mövcud olduğunu açıqlayıb.