Kiyevdə 42 illik sovet gerbi niyə indi sökülür?

Avropanın ən hündür abidəsi olan və “Ana Vətən” adlanan heykəlin hündürlüyü 100 metrdən çoxdur. Onun yerləşdiyi tarixi hərbi muzey isə Avropada ən geniş ərazili muzeyi hesab olunur.

Burada İkinci Dünya müharibəsindən sonra münaqişədən qalmış hərbi texnikalar və sursatlar nümayiş olunur. Heykəl vaxtilə SSRİ rəhbərliyinin qərarı ilə burada ucaldılıb.

Sözügedən abidənin də daxil olduğu memorial kompleksin baş direktoru Yuri Savçuk 32 il əvvəl tarixin arxivinə atılmış SSRİ-nin gerbinin niyə məhz indi sökülməsinin səbəblərini Baku TV-nin Şərqi Avropa bürosuna açıqlayıb.

“Memorial kompleksdə gerbin indiyədək saxlanılmasının səbəbi o idi ki, Sovet İttifaqına daxil olmuş keçmiş respublikalar uzun müddət ərzində postsovet ölkələri kimi inkişaf edirdilər. Fikrimcə, əslində, bununla bağlı bütün paralellər qüsurludur. Belə qərarların verilməsi üçün cəmiyyət yetişməli, yeni nəsil böyüməli və onun yeni tarixi yaddaşı formalaşmalıdır. Ümumiyyətlə, Vətən müharibəsi memorial kompleksinin əvəz edilməsi ilə bağlı Ukrayna cəmiyyətində ciddi müzakirələr gedib. Söhbət qalxanın üzərindəki təsvirdən və ümumiyyətlə abidənin gələcək taleyindən gedir. Hazırda Ukraynada İkinci Dünya müharibəsindən bəri ən böyük müharibə gedir. Qalxanda isə keçmiş Sovet İttifaqının gerbi təsvir olunub. O, Ukraynanın milli rəmzi – üçdişli sarı nizə ilə əvəz olunacaq”, – deyə o bildirib.

Qeyd edək ki, paytaxt Kiyevdə Sovet İttifaqı ilə bağlı digər nişanələr artıq bir neçə il əvvəldən ləğv edilib. Yalnız “Qələbə” prospektində SSRİ gerbi ötən ilin yazında sökülüb.