Kiyevdə vəziyyət yenidən gərginləşdi: Ukrayna HHMQ komandanlığından açıqlama

Noyabrın 10-u axşam saatlarında bütün Ukrayna üzrə ümumölkə hava hücumundan müdafiə xəbərdarlığı 2 aylıq fasilədən sonra yenidən işə düşüb.

Səhərə qədər kiçik fasilələrlə davam edən həyəcan siqnallarının ardınca Ukraynanın bir sıra şəhərləri, o cümlədən paytaxt Kiyev uzaqmənzilli raket zərbələrinə məruz qalıb.

Kiyev şəhər hərbi administrasiyasının məlumatına görə, bu, son 52 gündə şəhərə edilən ilk ballistik raket hücumu idi.

Ukrayna HHMQ komandanlığının rəsmisi Yuri İqnat bildirib ki, ilkin məlumata görə, bu, “İsgəndər-M” tipli ballistik raketlər idi:

“Bu raketlər “Patriot” hava hücumundan müdafiə sistemləri vasitəsilə zərərsizləşdirilib. Yerli hərbi administrasiyanın ilkin məlumatına görə, infrastruktura ciddi zərər dəyməyib və insanlar arasında itki yoxdur

Bir sözlə, növbəti hücum dəf edilib. Noyabrın 11-nə keçən gecə Ukrayna ərazisinə üç istiqamətdə 31 “Shahed” pilotsuz uçuş aparatından istifadə etməklə hücumlar həyata keçirilib.

Bu PUA-ların 19-u Ukraynanın Hava Hücumundan Müdafiə bölmələri tərəfindən məhv edilib. Hücumlar əsasən sərhəd bölgəsinə edilib. Bundan başqa, Ukrayna ərazisinə 3 raket də atılıb”.

Qeyd edək ki, hava hücumundan müdafiə xəbərdarlığı Kiyev də daxil olmaqla bütün Ukrayna ərazisində gün ərzində davam edib.