Kolumbiyada prezidentliyə namizədə silahlı hücum

Kolumbiyada seçki kampaniyası çərçivəsində Boqotanın qərbində keçirilən aksiya zamanı 2026-cı il seçkilərində Demokratik Mərkəz Partiyasından prezidentliyə namizəd, senator Migel Uribe Turbay silahlı hücuma məruz qalıb.

Bu barədə yerli media məlumat yayıb.

Bildirilir ki, senator tədbirdə çıxış edərkən iki silahlı şəxs onu arxadan güllələyib. Bundan sonra tədbir üçün əraziyə gələnlər və yerli sakinlər arasında təşviş yaranıb.

Qeyd edilib ki, altı güllədən ikisi siyasətçinin başına dəyib. Migel Uribe Turbay ağır vəziyyətdə xəstəxanaya çatdırılıb. Həkimlər siyasətçinin vəziyyətini stabilləşdirə biliblər.

Kolumbiyanın polis direktoru Karlos Fernando Triana faktla bağlı azyaşlının şübhəli şəxs qismində saxlanıldığını açıqlayıb. Onun sözlərinə görə, hadisə zamanı senator ayağından yaralanıb və hazırda həkimlərin nəzarəti altında müalicəsini davam etdirir.

Hadisə nəticəsində biri kişi və biri qadın olmaqla iki nəfər də yaralanıb, cinayət silahı aşkar edilərək götürülüb.

Bundan əlavə, hakimiyyət sui-qəsd cəhdinin bütün iştirakçılarının kimliyini müəyyən etməyə kömək edəcək istənilən məlumata görə 3 milyard peso, təxminən 730 min ABŞ dolları məbləğində pul mükafatı elan edib.