Kosmosdan qeyri-adi görüntü | İlk dəfə yayımlanan foto dünyaya səs saldı

Çinin "Tyanven-2" (Tianwen-2) adlı kosmik zondu Yerə yaxın yerləşən və "Ayın parçası" ola biləcəyi ehtimal edilən Kamoaleva asteroidini araşdırmaq üçün kosmosda uçuşunu davam etdirir. Aparat artıq kosmosdan çəkdiyi ilk real görüntünü Yerə ötürüb.

Bu barədə Çin Milli Kosmik Agentliyi məlumat yayıb.

Yayımlanan ilk fotoda zondun dairəvi günəş paneli aydın görünür. Panelin dizaynı NASA-ya məxsus "Lucy" kosmik aparatının strukturu ilə oxşarlıq təşkil edir.

Qurumun açıqlamasına əsasən, 28 may tarixində buraxılmış zond artıq 3 milyon kilometr məsafə qət edib.

Qeyd edək ki, bu asteroid yalnız vizual təsvirlərlə təqdim olunurdu. "Tyanven-2"nin əsas missiyası 2026-cı ilin iyulunda Kamoaleva asteroidinə çatmaq və onun səthindən nümunələr toplamaqdır. Bu nümunələrin 2027-ci ilin sonunda Yerə çatdırılması planlaşdırılır.

Kamoaleva asteroidi Günəş ətrafında Yerlə eyni orbitdə hərəkət edir və bəzi alimlər tərəfindən Ayın qopmuş parçası ola biləcəyi ehtimal edilir.