Kreml çağırdı, Kiyev nə dedi? | "Zelenski hazırdırsa, Moskvaya gəlsin"

Rusiya lideri Vladimir Putin ukraynalı həmkarı Volodimir Zelenski ilə görüşün mənasının olacağına şübhə ilə yanaşıb.

Bu barədə o, Çinə səfərinin yekunları ilə bağlı keçirilən mətbuat konfransında bildirib.

“Zelenski ilə görüşlərə gəlincə, mən belə görüşləri istisna etməmişəm, bu görüşlərin hər hansı bir mənası varmı?”, ‒ deyə Putin qeyd edib.

Rusiya lideri əlavə edib ki, Zelenski Moskvaya gəlməyə hazırdırsa, görüş baş tutacaq. Putin vurğulayıb ki, bunu ondan ABŞ Prezidenti Donald Tramp istəyib.

Ukrayna Xarici İşlər Nazirliyi isə öz növbəsində Putinin Moskvada görüşmək təklifini qəbul etməyib. Bu barədə Ukrayna xarici işlər naziri Andrey Sibiqa bildirib.

“Hazırda ən azı yeddi ölkə görüş keçirməyə hazırdır. Bunlar Avstriya, Vatikan, İsveçrə, Türkiyə və üç Körfəz dövlətidir. Bunlar ciddi təkliflərdir və Volodimir Zelenski istənilən vaxt belə bir görüşə hazırdır”, ‒ deyə Andrey Sibiqa sosial şəbəkədə yazıb.