Livanda aşkarlanan yeraltı yollar | Hizbullahla bağlı sensasiyalı açıqlama

“HİZBULLAH hərbi qruplaşmasının tunel şəbəkəsi HƏMAS-ın Qəzza zolağındakı tunellərdən daha təhlükəlidir”.

Belə bir məlumatla Fransanın “Liberation” nəşri çıxış edib. Xəbərə görə, qruplaşma 30 ildən də uzun bir müddət ərzində dərinliyi 40-80 metr arasında dəyişən yüzlərlə kilometr uzunluğunda tunellər qazıb.

Onların hətta İsrailə və Suriyaya çatdığı bildirilir.

Nəşrdə bu yeraltı yolların HƏMAS-ın qazdığı tunellərlə müqayisədə daha mürəkkəb və təhlükəli olduğu, hətta bəzilərinin partladılması zəlzələ və ya torpaq sürüşməsi ilə nəticələnə biləcəyi vurğulanıb.

Məlumata görə, HİZBULLAH sözügedən yeraltı keçid şəbəkəsini 2006-cı ildə İkinci Livan müharibəsindən sonra Şimali Koreya və İranın köməyi ilə yaradıb. Sözügedən məsələ ilə bağlı İsrailin “Alma” tədqiqat və təhsil mərkəzi də yazı dərc edib.

Xəbərə görə, onlarla kilometr uzunluğunda olan bu regionlararası yeraltı yollar şəbəkəsi hərbi qruplaşmanın mərkəzi qərargahının yerləşdiyi Beyrut bölgəsini, Bekaa vadisini və Livanın cənubunu birləşdirir.

Tunellərin və istehkamların bir hissəsi Litani çayının şimalındakı ikinci müdafiə xəttində yerləşir və İsrail işğalının qarşısını almaq üçün müdafiə xəttinə malikdir.

Bundan əlavə, tunellərin yerləşdiyi ərazilərdə HİZBULLAH-ın külli miqdarda tikinti materiallarından istifadə etdiyi və sakinlərin yaşayışına nəzarət etdiyi də vurğulanıb. Məlumata görə, ərazidə idarəetmə qüllələri, sursat və təchizat anbarları, səhra klinikaları və raketlərin buraxılması üçün istifadə edilən xüsusi siloslar var.