Mahaçqalada dəhşətli partlayış : 100-dən çox insan evsiz qaldı

Sentyabrın 14-ü gecə saatlarında Rusiyanın Dağıstan Respublikasının paytaxtı Mahaçqalanın Yelizarova küçəsində yerləşən hündürmərtəbəli yaşayış binasında qaz sızması nəticəsində partlayış baş verib.

Yerli KİV-in məlumatda qeyd olunub ki, baş verən yanğının sahəsi 600 kv.m-dir.

Fövqəladə Hallar Nazirliyindən də bildirilib ki, partlayış binanın 4-cü mərtəbəsində baş verib. Hadisə yerinə dərhal xilasedicilər cəlb olunub, 87 nəfər və 27 texnika işləyib.

Şəhər administrasiyasının məlumatına görə, yaşayış binasından 100-dən çox insan təxliyə edilib. Hadisə nəticəsində bir neçə şəxsin yüngül xəsarət aldığı, ölənlərin olmadığı bildirilib.

Şəhər hakimiyyəti qaz partlayışı baş verən evin sakinlərini müvəqqəti mənzillə təmin edib.