Mahaçqalada polislə etirazçılar arasında qarşıdurma: saxlanılanlar var

Dağıstanın paytaxtı Mahaçqaladakı hava limanında izdiham yaşanır.

Yüzlərlə sakin İsraildən gələn təyyarənin enməli olduğu hava limanı yaxınlığında toplaşıb. Etirazçılar təyyarədəki yəhudilərin Dağıstana enməsinə imkan vermirlər və İsrail əleyhinə şüarlar səsləndirirlər.

Rusiya Federasiyası Dağıstan Muxtar Respublikasının hüquq-mühafizə orqanları hava limanına əlavə qüvvələr cəlb edir. Toplaşanlar İsraildən gələn şəxsləri müəyyən etmək üçün sərnişinlərin sənədlərini yoxlayırlar.

Hətta Mahaçqala hava limanında yerli sakinlər bir nəfəri yəhudi hesab edərək saxlayıblar. Onun pasportuna baxışdan sonra Smolensk sakini və milliyyətcə tacik olduğu üzə çıxıb.

“Telegram” kanallarında bu barədə yayılan videolardan aydın görünür ki, dağıstanlılar polis müdaxiləsinə baxmayaraq, Mahaçqaladakı hava limanına daxil olublar.

Dağıstanın milli siyasət naziri Enrik Müslümov və gənclərlə iş üzrə naziri Kamil Saidov izdihamın yaşandığı Mahaçqala hava limanına gəliblər.

Bununla yanaşı, Rusiya Qvardiyasının əsgərləri və polis xüsusi təyinatlıları hava limanına daxil olub. Buna səbəb yüzlərlə etirazçının hava limanının binasına daxil olaraq uçuş-enmə zolağına çıxmasıdır.