Maqnit qasırğaları insana necə təsir edir?

Maqnit qasırğaları bəzi insanların özlərini pis hiss etmələrinə səbəb ola bilər, lakin qasırğaların sağlamlığa birbaşa təsirinə dair inandırıcı elmi dəlillər hələ yoxdur.

Bu barədə rusiyalı həkim-terapevt Marina Konstantinova danışıb.

Maqnit qasırğası güclü günəş emissiyaları nəticəsində Yer kürəsinin qoruyucu sahəsindəki dalğalanmadır. İstilik, işıq və kinetik enerji axınları planetin atmosferinə çırpılaraq, maqnit fonunda dalğalanmalar yaradır.

Həkimin sözlərinə görə, geomaqnit aktivlik günlərində tibbi statistika ürək-damar sisteminin vəziyyəti ilə bağlı şikayətlərin sayında artım qeydə alır.

"Baxmayaraq ki, meteohəssaslıq kimi rəsmi diaqnoz mövcud olmasa da, bəzi insanlar başağrısı, zəiflik, əsəbilik və ya iş qabiliyyətinin azalması kimi hallar yaşayırlar. Özünü pis hiss etmə psixoloji təsirlənmədən qaynaqlana bilər", – deyə həkim qeyd edib.

Marina Konstantinova əlavə edib ki, bu mövzu ilə bağlı dəlil bazası hələ ki zəifdir və dərin elmi tədqiqatlar tələb olunur.