Mars planeti ilə bağlı araşdırmanın nəticəsi açıqlandı | Elm adamlarından yeni kəşf

Marsın rəngi niyə qırmızıdır? Bu suala cavab tapmaq üçün növbəti araşdırmalar aparılıb.

Beynəlxalq tədqiqatçılar qrupu müəyyən edib ki, Mars tozunda əsasən dəmir tərkibli mineral ferrihidrit, başqa sözlə desək, hidratlı dəmir oksid var. Bu kəşf Qırmızı planetin keçmişdə soyuq, lakin rütubətli dövrlər yaşadığını göstərir və onun iqlim təkamülünün əvvəlki modellərini şübhə altına alır.

Bu kəşfi təsdiqləmək üçün alimlər Mars tozu ilə ferrihidrit, bazalt və sulfatların laboratoriya nümunələri arasında spektral müqayisələr aparıblar. Nəticələr ferrihidritin müşahidə məlumatlarına ən yaxşı uyğunlaşdığını göstərib.

Bundan əlavə, laboratoriya təcrübələri onun müasir Mars şəraitində sabitliyini nümayiş etdirib.

Ferrihidrit Marsın qırmızı rənginə güclü spektral uyğunluq təmin edir, çünki onun optik xassələri hematitdən daha çox spektral müşahidələrlə üst-üstə düşür.

Alimlər bildirirlər ki, bu, təkcə Marsın tarixini anlamaq üçün deyil, həm də həyat əlamətlərinin axtarışı baxımından əhəmiyyətlidir.

Ferrihidrit tez-tez soyuq, sulu mühitlərdə əmələ gəlir, bu da qədim Marsın həyat üçün uyğun şərtlərə malik ola biləcəyini göstərir.