Maşın həvəskarlarının diqqətinə | “Monza” modelinin özəllikləri

"Car&Classic" hərracı mart ayının sonunda çox nadir "Ferrari Monza SP1" "superkar"ını satışa çıxaracaq.

Onun fərqli xüsusiyyətlərindən biri tək oturacaqlı kokpit hesab olunur.

Ümumiyyətlə, "Ferrari"nin cəmi 129 belə avtomobil istehsal etdiyi bildirilir.

Hərrac qiymət gözləntilərini açıqlamır, lakin "superkar" təkcə nadirliyinə görə deyil, həm də demək olar ki, yox dərəcəsində olan yürüşünə – cəmi 140 kilometrə görə milyonlarla dollar dəyərində ola bilər.

"Ferrari" konserni "Monza" modelini 1950-ci illərin yarış barkettalarına hörmət əlaməti olaraq "812 Superfast" "superkar"ı əsasında hazırlayıb. Ümumi tiraj 499 avtomobil təşkil edib. Başlanğıc qiyməti 3 milyon dollar olan "superkar" yalnız ən sadiq müştərilərə təklif olunub və onlara bir, yaxud iki oturacaqlı salon variantları arasında seçim etmək imkanı verilib. Lakin alıcıların əksəriyyəti sərnişin oturacaqlı olan versiyanı üstün tutub.

"Ferrari Monza"nı robotlaşdırılmış ötürmə qutusu ilə birlikdə 810 at gücündə mühərriklə təchiz edib. Maksimal sürəti saatda 300 kilometr olan "Monza" modeli 3 saniyəyə 100 km/saat sürətə çata bilir. Satışa çıxarılan nüsxə 2020-ci ildə yığılıb.