Medvedev və Zaxarova Avropaya od püskürdü | Sərt cavab

Rəsmi Moskva Avropa İttifaqının “Rusiyaya verilən qızılların Rumıniyaya qaytarılması” ilə bağlı qəbul etdiyi qətnaməyə cavab verib.

Ölkənin Təhlükəsizlik Şurasının sədr müavini Dmitri Medvedev bu tələbi əsassız və dəxlisiz adlandıraraq qarşı tərəfi təhqir etməkdən də çəkinməyib:

“Aİ Rusiyadan 300 milyard dollarlıq aktiv oğurlayıb və Rumıniyanın qızıllarının geri qaytarılmasını istəyir. Mövcud duruma dair rus dilində deyiləcək heç bir kəlimə yoxdur, olanları isə çox pis çıxır”.

Sözügedən sənədə Rusiya Xarici İşlər Nazirliyinin sözçüsü Mariya Zaxarovadan da cavab gecikməyib. O, açıqlamasında rumınların yalan danışdığını deyib:

“Rusiyanın Rumıniyaya heç bir borcu yoxdur. Tam əksinə, məhz Rumıniyanın Rusiyaya bütün qızıl ehtiyatından 20-25 dəfə çox borcu var. 1916-1917-ci illərdə Rusiyaya ixrac edilmiş qızıl bunun heç bir faizi də deyil.

Hitlerin keçmiş müttəfiqi olan Rumıniya rusofob platformalardan, istənilən anti-Rusiya addımlara yol verən Avropa Parlamentindən istifadə edərək öz fantom əsrlik borclarını, acınacaqlı vəziyyəti düzəltmək məqsədilə üzərimizə atmağa çalışır”.

Qeyd edək ki, Avropa Parlamenti Rusiyanı qızıl və mədəni irs obyektlərini Rumıniyaya qaytarmağa çağıran qətnamə qəbul edib.

Məlumata görə, 1916-1917-ci illərdə Rumıniya işğal olunarkən Milli Bankın ehtiyatını təşkil edən 91,5 ton qızıl, zərgərlik məmulatları və nadir sikkələrin kral kolleksiyalarını, dövlət arxivləri və sənədlərini, qiymətli tarixi əlyazmalar, rəsm əsərləri, nadir kitablar və bir çox dövlət və özəl qurumların kolleksiyalarını qorunub saxlanılması üçün Rusiyaya göndərib.