Mənası və kimə ünvanlandığı bilinməyən mesajlar yayımlandı

UVB-76 kimi tanınan və "Qiyamət günü radiosu" adlandırılan radiostansiya yenidən sirli mesaj yayımlayıb.

Məlumata görə, radiostansiya mayın 20-də efirə çıxaraq "leşoteyn" sözünü səsləndirib. Mesajın mənası və kimə ünvanlandığı isə məlum deyil.

Qısadalğalı radiostansiyada sonuncu dəfə mayın 19-da "Bundot" sözündən ibarət yeni sirli mesaj yayımlanıb. Bu barədə stansiyanın fəaliyyətini izləyən rəsmi "Telegram" kanallarında məlumat yerləşdirilib.

Sözügedən elan səhər saatlarında paylaşılsa da, mesajın mənası ilə bağlı heç bir əlavə şərh və ya izahat verilməyib. Bu sirli mesajın yayılması Belarus ərazisində keçirilən taktiki nüvə təlimləri ilə eyni vaxta təsadüf edib.

Belə ki, mayın 18-də həmin ölkədə qeyri-strateji nüvə silahının tətbiqi üzrə məsul olan hərbi bölmələr manevrlərə start verib. Təlimlərin əsas məqsədi hərbçilərin real döyüş şəraitində fəaliyyətə hazırlıq səviyyəsini yoxlamaqdan ibarətdir.

Eyni zamanda bu hərbi manevrlərin hər hansı üçüncü dövlətə qarşı yönəlmədiyi xüsusi olaraq vurğulanıb.