Merz və Tramp vacib məsələdə razılığa gəldi

Almaniya kansleri Fridrix Merz ABŞ Prezidenti Donald Trampla telefon danışığı zamanı ölkəsinin təhlükəsizlik məsələlərində daha böyük məsuliyyət daşıyacağını bəyan edib.

Bu barədə Almaniya hökumətinin rəsmi nümayəndəsi Ştefan Kornelius jurnalistlərə açıqlamasında bildirib.

Onun sözlərinə görə, Merz söhbət zamanı Trampı ABŞ-nin müstəqilliyinin 250 illiyi münasibətilə təbrik edib və almanlarla amerikalılar arasında xüsusi münasibətlərin mövcudluğunu vurğulayıb.

Kornelius qeyd edib ki, tərəflər Ankara şəhərində keçiriləcək NATO sammiti ərəfəsində mövqelərini də uzlaşdırıblar: "Kansler vurğulayıb ki, Almaniya Avroatlantik regionun təhlükəsizliyi naminə daha çox məsuliyyət götürəcək. Onun sözlərinə görə, NATO transatlantik alyans olaraq qalması üçün daha çox Avropa yönümlü olmalıdır".

O həmçinin əlavə edib ki, Merz və Tramp Ankara sammiti çərçivəsində danışıqları davam etdirmək barədə razılığa gəliblər.