Məşhur rejissor ilk dəfə "Oskar" aldı | Qaliblərin adı bəlli oldu - Baku TV

ABŞ Kinoakademiyasının “Oskar” mükafatının qalibləri məlum olub.

Gözlənildiyi kimi, bu ilin favoritləri – “Döyüş ardınca döyüş” və “Günahkarlar” filmləri qalib seçilib.

Bu vaxta qədər “Oskar” mükafatı almayan Pol Tomas Anderson mərasimi bir neçə nominasiya üzrə qalib kimi tərk edib.

Beləliklə, ən yaxşı film “Döyüş ardınca döyüş”, ən yaxşı animasiya filmi “K-pop iblis ovçuları”, ən yaxşı rejissor Pol Tomas Anderson, ən yaxşı aktyor Maykl B.Cordan, ən yaxşı aktrisa Cessi Bakli seçilib.

İkinci planda ən yaxşı qadın rolu üzrə “Silahlar” filmində iştirakına görə Emi Mediqan, ikinci planda ən yaxşı kişi rolu üzrə isə “Döyüş ardınca döyüş” filmindəki iştirakına görə Şon Penn qalib olub.

Ən yaxşı kastinqə görə “Döyüş ardınca döyüş” filmi mükafatlandırılıb. Ən yaxşı orijinal ssenari “Günahkarlar”, ən yaxşı adaptasiya olunmuş ssenari isə yenə də “Döyüş ardınca döyüş” filmi seçilib.

Ən yaxşı vizual effektlərdə qalib “Avatar: Alov və kül” filmi olub. Ən yaxşı səs “Formula-1”, ən yaxşı orijinal saundtrek “Günahkarlar”, ən yaxşı mahnı nominasiyasına “K-pop iblis ovçuları” filmindən “Golden” layiq görülüb.

Gilyermo del Toronun “Frankenşteyn” filmi gözlənildiyi kimi təsvirlə bağlı nominasiyalarda qalib gəlib. Ən yaxşı qrim və saç düzümü, ən yaxşı kostyumlar, ən yaxşı quruluşçu rəssam işi mükafatlarını “Frankenşteyn” sahiblənib.